<$BlogRSDURL$>

Sunday, April 4

அற்புத நாள் 

நேற்று ஒரு அற்புத நாள். விட்டால், வீட்டை அங்குலம் அங்குலமாகத் துடைத்திருப்பேன். பயங்கர கிளினீங் ஸ்பீரி.

அதனோடு, முக்கிய வேலை, கட்டுரைத் தொகுதி ஒன்று வெளியிடுவதற்காகக் கட்டுரைகளைத் தொகுப்பது. 1999/2000க்கு பின் எழுதிய அனைத்தும் கணினியில் இருந்ததது. அதற்கு முன் உள்ளதைத் தேடிப் போக, கிடைக்காதனவெல்லாம் கிடைத்தன.

முக்கியமாக, 1998 நான் எழுதிய ஒரு நாவல் கிடைத்தது. நானும் ராகவனும் 98 மார்ச் கடைசி வாரத்தில், கன்னியாகுமரி விவேகானந்தர் மையத்தில் ஒரு வாரம் தங்கியிருந்து, ஆளுக்கொரு நாவல் எழுதினோம். மறக்க முடியாத அநுபவம். காலையில், கடற்கரை வரை ஒரு நடை. பின், காபி, சிற்றுண்டி சாப்பிட்டுவிட்டு, உட்கார்ந்தால் மதியம் வரை எழுத்து. குளித்து, மதிய உணவு முடித்து மீண்டும் உட்கார்ந்தால், மாலை வரை எழுத்து. மாலை காபியோடு ஒரு நடை. மீண்டும் எழுத்து. இரவு உணவு. மீண்டும் எழுத்து.

இதுநடுவே, சுந்தர ராமசாமியைப் பார்க்கப் போவது, கன்னியாகுமரி கோவிலுக்குப் போவது, மற்றுமுள்ள நண்பர்கள் வீட்டுக்குப் போவது என்று வைத்துக்கொண்டு, ஒரு விடுமுறையை அற்புதமாகக் கொண்டாடினோம். சென்னை வந்தபின், அந்த நாவலை திரும்பிக் கூடப் பார்க்கவில்லை. ஒரு நிலையில காணாமலே போய்விட்டது என்றுதான் நினைத்தேன். நேற்று கிடைத்துவிட்டது. கிட்டத்தட்ட 150 பக்கங்கள். இன்றைய வளர்ச்சியில், அந்த நாவலை மறுபடி எழுதினால் தான் பிரசுரிக்கத் தகுதியாக இருக்கும் என்று தோன்றுகிறது. மற்றொரு விடுமுறை எப்போது கிடைக்கப் போகிறதோ?

அடுத்தொரு அதிசயம், கவிதைகள். கவிதைகளைப் பொறுத்தவரை நான் காத்திருப்பவன். மற்ற எழுத்து வகைகளை அடித்துத் துவைத்து பிழிந்து காயப் போடத் தயங்காதவன். ஆனால், கவிதைக்கு மட்டும் வேறு சலுகை. அது தன்னால் வரும் வரை நான் காத்திருக்கத் தயார். எதையும் எப்படியும் எழுதிவிட வேண்டும் என்ற பரபரப்பு துளியும் இல்லாதவன். அநுபவம் கவிதையாகக் கனிந்துவரும் வரை காத்திருப்பதில் எனக்கு எந்தப் பிரச்சினையும் இல்லை.

நேற்று அப்படித்தான், கிட்டத்தட்ட 13 கவிதைகள் கிடைத்தன. 2000க்குப் பின் மூன்றோ நான்கோ கவிதைகள்தான் எழுதியிருக்கிறேன். அவை பத்திரமாகக் கணினியில் இருக்கின்றன. எளிமையான கவிதைகள். படிக்கும்போதே மகிழ்ச்சியாக இருந்தது. 1995ல் 'வேறுமுகம்' என்றொரு கவிதைத் தொகுதி வந்தது. எனக்குத் தெரிந்து யாரும் அதைப் படித்தாற்போல் தெரியவில்லை. அதில் 21 கவிதைகள் இருக்கின்றன. மொத்தமாய்க் கூட்டினால், எனது 17 வருட சர்வீஸில் 37 கவிதைகள் எழுதியிருக்கிறேன். அதிகம்தான்!!!

மொத்தமாய்த் தொகுத்து, ஒரு தொகுதி கொண்டுவரலாம் என்று தோன்றியது. ராகவன், கவிதையெல்லாம் போடமாட்டேன், கொண்டே வராதே என்றுவிட்டான். வேறு பதிப்பகம் தேடவேண்டும். இல்லை சுயமாய் போட்டுவிடவேண்டியதுதான். தொகுதிக்கு தலைப்பு ரெடி,

'முகமற்றவர் நினைவாக'

வெங்கடேஷ்

|

This page is powered by Blogger. Isn't yours?


free hit counter
தேர்தல் செய்திகள்
களஞ்சியம்
Weblog Commenting and Trackback by HaloScan.com